.

في خاطري موضوع كنت أودّ أن أتحدث عنه من زمن طويل ..

واسمحوا لي سوف أتكلم بلهجة أحسائية عامية كي أتحدث بكامل أريحيتي ويكون كلامي قريب من القلب. 

دايماً عندنا تقييم للدول اللي سبق زرناها ، مثل نقول : هذه بلد " ما تنبغى " لأنهم يستغلون زوار البلد ، وهذه البلد "روعة" لأن أهلها طيبين "حيل" وهذه البلد أهلها " حرامية" لأنهم يسرقون 

هذا التقييم العام يعتبر مؤشر عام يتكلم فيه كثير من الناس عن تجاربهم في السفر ويحاولون بهذا التقييم يعطون أصدقاءهم نصايح او تحذيرات أو ارشادات للبلدان اللي زاروها علشان يكون عند اصدقاؤهم تصور واضح عن اي دولة ناوين يزورونها مستقبلاً 

أرجع لزبدة موضوعي :

وهو يخص المؤشر العام عن انطباع الناس عن " الحسا " خصوصا السياح اللي أول مرة يزورونها ويحبون يستكشفونها خصوصا بعد انتشار المكاتب السياحية اللي تروج لزيارة الحسا ، او اللي يزورونها وعندهم بزنس او حابين يشترون بضايعهم منها ، 

هل هم راضين فعلا عن زيارتهم أم يجاملونا .. ؟

هل هم مرتاحين فعلا من اللي يشوفونه ويعيشونه أو يجاملونا لما نسألهم " شرايكم في الحسا "؟

أكيد بتقولون أن الحساوية معروفين بأخلاقهم وتعاملهم الطيب وهذا ما اختلفنا عليه أبد ، لكن اللي بيزور الحسا يبغي يشوف الطيبة ويبغي يشوف ايضا احترام نظام المرور ، يبغي يشوف كرم وضيافة الحساوية ويبغي يشوف بعد نظافة في الشوارع اللي جنب هالبيوت اللي زارها ، واذا زار حديقة يبغي يستلقي على الحشيش (العشب) النظيف مو "يتكرفع" بأوساخ وأكياس مرمية هنا وهناك

يبغي يتمشى بسيارته يكتشف أنفاق وجسور الحسا ولكن يبغي ناس تحترم سياقته اللي متعلم عليها في بلادهم ، مو ناس كأنهم " طيور تطير " يتسابقون بنظام " نفسي نفسي " ولا كأن أحد غيره موجود في الشارع 

يبغي يتمشى مع عايلته في الممشى ولا يمر جنبهم " مواطير " تطير قلبه على عياله أو تقلق راحته 

كثير نتكلم عن اعجابنا باليابان واحنا نختلف عنهم دينيا وما نعرف حتى لغتهم ونتكلم عن اعجابنا بأسلوب حياتهم المنظم ونظافتهم ودقتهم العجيبة ولكن اللي وصلوا له من تطور سببه رغبتهم العامة في التغيير علشان يصبحوا مثال عالمي في الوعي المدني والالتزام 

وهذا المثال ينطبق مو بس على اليابان او دول الغرب بل ينطبق حتى على دول افقر منا بكثير وقاعده حياتهم تتغير للافضل ويوم عن يوم يتطورون ويختصرون الزمن وينتعش اقتصادهم بسبب رقيهم في التعامل المدني ومستقبلا بيسبقونا وبنسمع عنهم مستقبلا انهم من دول العالم الاول .

بالمقابل ترى في الحسا تطور في المشاريع وافتتاح المولات وبناء الجسور والانفاق ولكن مع بالغ الأسف نشعر ان هناك تراجع في المؤشر العام في بعض النقاط الهامة كأخلاقيات قيادة السيارات   

طبعا كلامي هذا ما ينطبق على كل الحساوية

 ففيهم واجد رائعين ويحترمون الذوق العام ، ولكن كلامي عن مدى تطورنا مدنياً واتجاهنا نحو التغيير الايجابي ، والانطباع العام اللي نشترك فيه كلنا 

الخلاصة أن الطيبة بدون أخلاقيات مدنية راقية ومتحضرة ما تنفع

#سعيد الرمضان#